10 профессиэш – Йошкар-Олан строительный техникумышты

1 сентябрьын техникумышты Мары Элӹн стройышы отрасльлан образовательно-производственный кластерӹм пачмы.

Республикӹн Глава Юрий Зайцев торжественный мероприятиштӹ ти событим пиш керӓлеш шотлен.

«И йӹде лу тӹжем квадратный метрвлӓ доно у ӹлӹмӹ вӓрвлӓм ходышкы колтенӓ, шукым строенӓ. Строитель професси доно кӹлдӓлтшӹ специальностеш ик вӓрӹштӹ тымдымаш студентвлӓлӓнӓт икӓнӓштӹ икманяр пӓшӓм пӓлен нӓлӓш яжо йӧнӹм ӹштӓ, кыдывлӓ кӹзӹтшӹ жепӹн когонок керӓл ылыт. Тыменяшдӓ цилӓ ӹштӓш цацымы, вет тӓ кыце тыменьӹдӓ, тенге отрасль анзыкыла виӓнгӓш тӹнгӓлеш», – Юрий Зайцев келесен.

Техень йӧн «Профессионалитет» федеральный проектӹштӹ техникумын участвуйымыжы велдӹк лин. Тидӹлӓн 147 млн тӓнгӓм айырен пумы, кыды инфраструктурым уэмдӓш, жеплӓн ярал у оборудованим шӹндӓш, программывлӓлӓн келшӹшӹм вашталташ, тыменьмӹ кӹдежвлӓм дӓ мастерскойвлӓм яжоэмдӓш кычылтмы.

Тенге тымдымашкы регионын 13 стройышы организаци ушнен. А тымень пӹтӓрӹмӹ паштек пӓшӓм пушы 22 договорым ӹштӹмӹ.

Техень 10 професси дон специальностеш студентвлӓ тыменяш тӹнгӓлӹт: общестроительный, отделочный дӓ декоративный пӓшӓм ӹштӹшӹ мастер, ЖКХ-н инженерный системывлӓм тӧрлӹшӹ дӓ анжен мишӹ мастер дӓ молат.

1952 ин пачмы техникум регионышты профессиональный образованим пушы анзылны кешӹ учреждениэш шотлалтеш.

Техникум «Профессионалы» Чемпионатын регионышты эртӓрӹмӹ конкурсын вӓржӹ ылеш. Студентвлӓштӹ ик гӓнӓ агыл Чемпионатын пӹтӓртӹш этапышты «Кирпичная кладка» дӓ «Печное дело» пӓшӓвлӓ доно призер линӹт.

Мары Эл Республика Главан Администрацин пресс-службын отдел. «Жерӓ» №36 (10964), 12 сентябрь 2025 ин.