Чӹнь инӹт, пикшӹмӓт кӹшкенӹт
Районыштына спортын кыргыжталшы ветеранвлӓ ылыт, но ӹдӹрӓмӓшвлӓ республиканский тӓнгӓшӹмӓшкӹ кеӓш шеклӓнӓт… Сӓй, ӹшке районлан ӹнян лиӓш дӓ спорт гачат лӹмлештӓрӓш келеш.
Командышкӹ имӓш доно эдемвлӓм погаш нелӹ. Телӹм тренируялташ районыштына бассейн келеш, а Козьмодемьянскышты кашташ окса шӓвӓлтеш. Тишкӹ иӓш халаштышы педагог-ветеран Галина Буякова каштеш, спортын ти вид доно тӹдӹ сӓмӹрӹкшӹ годымат занимаялтын. Тевеш, Мары Элӹн пенсионервлӓ лошты вӹзӹмшӹ Спартакиадышты, Йошкар-Олашты, тӹдӹ 50 м сек чӹнь эртӹш, минспортын шӧртньӹ медаль дӓ икшӹ степенян медаль доно пӓлемдевӹ. Мӹнят 50 метрӹм ин кешӹм, заплывыштем кокшеш пырышым, но весӹштӹ Йӱрнӹн ветеран доля секундеш яжорак результатым анжыктен. Мӹлӓм той медаль вӓрештӹ.
Спартакиадын программышкы спортын вӹц вид пыра. Медведево поселкын стадионышты халана верц Зинаида Гордеева вим 500 метрӹштӹ тергӹш, а районланна 1000 м кытыштӹ очкам Вениамин Семенов пуш. Вениамин Вячеславович командым цымырен, а Козьмодемьянскыным – ветеранвлӓн Советӹн председатель К.А. Молодцова. Тау – нинӹлӓн дӓ соцзащита отделвлӓм вуйлатышывлӓлӓн. Нӹнӹ Спартакиадышкы кеӓш автомашинӓм пуэнӹт.
Мастарлыкым халанан шахматиствлӓ Николай Ягодкин, Надежда Залесенская, районнан командышты Песерал гӹц Павел Романов анжыктенӹт.
Цилӓн мишеньӹш изи пикшӹм (дротикӹм) кӹшкенӹт. Тӧр чучаш куштылгок ылде. Сӹнгӹшеш техничныйвлӓ лӓктӹнӹт. Дартс спортым цилӓ вӓре, хоть-кынам видӓш лиэш: школыштат, культура пӧртвлӓштӓт, спортзалвлӓштӓт, айовлӓ годымат.
Спартакиада анжыктыш: чӹнь ин мыштышы спортсменвлӓ керӓл ылыт. Халавлӓштӹ бассейн улы, тӹшкӹ вим тергӓш телӹмӓт пӱлӓн каштыт. Техеньӹвлӓ ти тӓнгӓшӹмӓштӹ айыртемӓлтевӹ. Тевеш, Галина Буякова имӓш доно цилӓн гӹц чӹнь кеш, чемпион ли. Халан команда икшӹ вӓрӹм нӓльӹ, а районна гӹц ишӹвлӓм нӓнгеделыт.
Команда доно сӹнгӹмӓшкӹ спортын цилӓ вид доно эдемвлӓм нӓнгемӹ доно веле шоаш лиэш. Ӹнянӹмӹ шоэш: 20-шы июньын кубок верц кредӓлӓш сӓмӹрӹквлӓм, а первенствышкы спортын ветеранвлӓм, 35 и гӹц когораквлӓм, ответственный спортработниквлӓ нӓнгеӓт лиэш.
И. ЛОБАНОВ. «Жерӓ» №24 (11003), 11 июнь 2026 ин.