Борынгыдан килгән йола ул

Безнең якта бәйрәм бүген,

Бездә бүген тантана!

Өйдән-өйгә йөреп әнә

Күкәй җыя һәр бала.

Төсле күкәй, төсле күкәй!

Бик матуры бер генә!

Иң матуры – иң өлгергә,

Алыгыз, кем өлгерә!

Арча районы Каенсар авылында борынгыдан килгән йолаларның берсе “Кызыл йомырка җыю” бәйрәме узды.

Бала-чага иртә таңнан иң изге теләкләрен әйтә-әйтә өйдән-өйгә кереп, авыл буйлап йомырка, тәм-том, күчтәнәчләр җыеп кайтты. Аннан соң елдагыча Каенсар авыл клубы каршындагы бәйрәмгә җыелды. Ә анда балалар өчен төрле төрле онытыла барган матур уеннары, бәйгеләре белән мәдәният хезмәткәрләре ачык йөз белән каршы алды.

Каенсар авыл балалары, кунакка кайткан балалар бергәләшеп дус- тату булып рәхәтләнеп күңел ачтылар, җырладылар- биеделәр, табышмакларга җаваплар эзләделәр, тиз әйткечләр, мәкальләр белән таныштылар, йомыркалар тәгәрәттеләр, татар халкының милли уеннарын уйнадылар. Бәйрәм оешкан төстә бик матур узды.

Фәридә Борханова, Арча районы Яңасала авыл китапханә мөдире