Канон преподобному Трифону Печенгскому

Кано́н преподо́бному три́фону пече́нскому чудотво́рцу.
Ему́же краегране́сие. Приими́ пе́снь Три́фоне, прие́мляй дни́ бла́ги.

Гла́с. 4. Пе́снь 1.

Ирмо́с: Наста́вльшего дре́вле изра́иля бежа́ща от рабо́ты фарао́ня. и спа́сша в мо́ри, и в пусты́ни пите́вша, воспое́м изба́вителя Бо́га на́шего я́ко просла́вися.

А́з Бо́г пе́рвый, а́з же по си́х, ра́зве мене́ не́сть Бо́га и тому́ я́коже А́з, проро́ком свои́м рече́, ты́ и на́м отве́рзи пло́тная уста́, воспе́ти твоего́ раба́, и сего́ пою́щу, сло́во ми́ вдохни́.

Приими́ пе́снь твоего́ раба́ о́тче, бога́тными бла́годетьми, и возда́ждь грехо́м оставле́ние, на суде́ ми́лость, и небе́снаго ца́рствия наслажде́ние, иде́же ты́ пребыва́еши о́тче.

Ру́це просте́ртием чи́стых ти́ моли́тв, безпло́тныя враги́ струя́ми сле́з твои́х до конца́ потопи́л еси́, и купе́ль мы́сленную в ни́х соде́лал еси́, омыва́еши прегреше́ния, восхваля́ющым тя́ преподо́бне.

Богоро́дичен: Из ложе́сн твои́х возсия́ пресла́вно вели́кое Со́лнце Христо́с Бо́г Богоро́дице Де́во. и вся́ земны́я конца́ просвети́в, и преподо́бных по́ты прия́л е́сть че́стно.

Пе́снь 3.

Ирмо́с: Да не хва́лятся хваля́йся, но о се́м е́же разумева́ти, я́ко не́сть я́коже Бо́г на́ш, воздви́гнувый ро́г на́ш и дая́ кре́пость царю́ на́шему.

Иму́ще споспешеству́ющую боже́ственую благода́ть, исцеле́ния безчи́сленная источа́ют мо́щи твоя́, и отгоня́ют от челове́к лука́выя ду́хи, притека́ющим ти́ пресла́вне.

В ме́сто от ме́ста преходя́, бе́гая сла́вы от челове́к, небе́сныя сла́вы рачи́тель быва́я, о́тче преподо́бне Три́фоне, страсте́й мра́к разгна́в, и к све́ту доброде́телей доше́д.

И ненаселе́нная тобо́ю населя́ется о́тче, я́ко бо заря́ просия́ша ти́ доброде́тели, ею́же осия́вшися, в пусты́ню я́ко во гра́д мно́жество мни́шеское сти́чется.

Богоро́дичен: Пречи́стая Влады́чице ро́ждьшия земны́м окорми́теля и Го́спода, страсте́й мои́х непостоя́нное и лю́тое разжени́ смуще́ние, и тишину́ пода́ждь се́рдцу моему́.

Седа́лен. Гла́с 4. Стра́стное порабо́тил еси́ плотско́е мудрова́ние, и го́ршее покори́л еси́ лу́чшему о́тче пресла́вне. сокруши́л еси́ вы́я бесо́м. и посто́м возсия́л еси́ в ми́ре, я́ко со́лнечных сия́ний твоя́ доброде́тели, сего́ ра́ди тя́ почита́ем.

Сла́ва. И ны́не. Богоро́дичен. Стена́ непобеди́мая на́м, христиа́ном, еси́, Богоро́дице Де́во: к тебе́ бо прибега́юще невреди́ми пребыва́ем, и, па́ки согреша́юще, и́мамы тя́ моли́твенницу. те́м благода́рственно вопие́м ти́: ра́дуйся, благода́тная, госпо́дь с тобо́ю.

Пе́снь 4.

Ирмо́с: Услы́шах сла́вное смотре́ние твое́ христе́ Бо́же. я́ко роди́ся от де́вы, да от льсти́ изба́виши вопию́щая ти́, сла́ва си́ле твое́й Го́споди.

Естество́м доброде́телей о́тче наве́ты нося́. терпя́ же и своя́ на тя́ воста́ющая, оте́ческим нра́вом после́дуя, те́х житие́ в себе́ име́я.

Сла́нное о́тче неве́рия мо́ре, истека́ющими от тебе́ си́лами и зна́мении возмуща́ется, и злоче́стие благоче́стнем ло́пи изменя́ется, и тма́ неве́дения богоразу́мием просвеща́ется.

Невозвра́тно ше́ствовал еси́ веду́щими к небеси́ стезя́ми боже́ственными, о́тче преподо́бне Три́фоне досточу́дне, от злы́х веду́щих до конца́ уклони́лся еси́.

Богоро́дичен: Ты́ еди́на су́щим не земли́, и́же естества́ благи́м хода́таица Ма́ти Бо́жия яви́ся, те́м же ти́ ра́дуйся вопие́м.

Пе́снь 5.

Ирмо́с: Ча́сть моя́ еси́ Го́споди, и сла́ва лицу́ моему́. ты́ бо мя́ из тмы́ неве́дения еди́н изба́ви богоразу́мие, и тебе́ молю́ся Христе́. да́руй рабу́ си́ ми́р, я́ко человеколю́бец.

Разгна́в страсте́й мра́к о́тче. ко све́ту доброде́телей доше́д. и све́тел бы́в, мра́чныя ду́хи лука́вствия отгоня́еши от челове́к Три́фоне.

И́же от лю́таго бе́са наси́луемый ю́ноша, пра́ведне от тебе́ о́тче исцеле́ние прие́млет запреще́нием. погре́шьшу же ему́ па́ки в сладосла́стие, от тебе́ поноси́м быва́ет.

Фомаи́ды преподо́бные целому́дрию поревнова́в, чистоту́ о́тче притяжа́в, и́мже на боже́ственую любо́вь восше́д, прия́т да́ры исцеля́ти неду́ги ду́ш и теле́с на́ших.

Богоро́дичен: Оцысти́лище естеству́, Ты́ еси́ еди́на богоблаже́нная. на ра́ме бо херуви́мских седя́щаго Бо́га дла́ньми носи́вши вопие́ши, да́руй рабо́м свои́м ми́р я́ко человеколю́бец.

Пе́снь 6.

Ирмо́с: Да не погрузи́т мене́ бу́ря водна́я, ниже́ да пожре́т мене́ глубина́. отве́ржен бо бы́х во глубину́ се́рдца морска́го зо́л мои́х. те́м же ти́ вопию́ я́ко ио́на. да изы́дет от тли́ живо́т мо́й, к тебе́ многоми́лостиве.

Но́сиши о́тче кро́тостию наве́ты, и ла́яния лука́вых бесо́в, и челове́к злы́х нахожде́ния бесо́вскою пре́лестию подвиза́емых на́ тя уби́ти. ты́ же сия́ терпя́ отхо́диши во вну́тренюю пусты́ню.

Еди́ной любве́ христо́ве ду́шу свою́ преподо́бне Три́фоне приложи́в. все́ю душе́ю потща́лся еси́ искорени́ти е́ллинская бесо́вская мудрова́ние, и от зве́рскаго устремле́ния свободи́ти лю́ди, тя́жкия и суро́выя.

Преше́д мо́ре в да́льнюю и незна́емую страну́ вселя́ешися, иде́же благоче́стие ни сло́во слы́шашея. та́мо свои́ми моли́твами я́ко ди́виих звере́й укроти́л еси́, и на па́жить живоно́сную наста́вив, ко христо́ве ве́ре я́ко овча́та приве́л еси́.

Богоро́дичен: Руно́ богоно́сное Тя́ прообрази́ Де́во, запечатле́нный исто́чник присноживы́я воды́, о́др его́же обстоя́т си́лнии, сего́ неискусому́жно вмести́ла еси́ чи́стая.

Конда́к. Гла́с 2. Чистото́ю душе́вною боже́ственне вооружи́вся, и непреста́нныя моли́твы я́ко копие́ в ру́це имы́й, кре́пко пробо́л еси́ бесо́вское ополче́ния, Три́фоне о́тче на́ш, моли́ христа́ Бо́га непреста́нно о все́х на́с.

И́кос. Возлюби́в преподо́бне христо́вы боже́ственныя за́поведи, и возненави́де ми́ра сего́ наслажде́ние, прии́де усе́рдно к тому́, и бы́сть свети́льник просвеща́я концы́, блиста́нием духо́вным. те́м припа́дая молю́ тя́. просвети́ ми́ о́чи душе́внии, воспе́ти твоя́ по́двиги. поще́ние, и бде́ние, и сле́зы. боле́зни, и изможде́ние те́ла, блаже́нныя ра́ди бу́дущия жи́зни, ея́же наслажда́ешися. моли́ непреста́нно о все́х.

Пе́снь 7.

Ирмо́с: Не преда́й же на́с до конца́ и́мени твоего́ ра́ди. и не разруши́ заве́та твоего́, и не оста́ви ми́лости твоея́, от на́с. Го́споди Бо́же оте́ц на́ших, прехва́льный во ве́ки.

И́же злы́ми при́сно обурева́емии, и страстьми́ содержи́ми, к тебе́ прибега́юще, бо́гови моли́твенника предлага́ем, Три́фоне преподо́бне. те́м же ми́лостивно на́с посеща́й о́тче, да тобо́ю спасе́ни пое́м, благослове́н бо́г оте́ц на́ших.

Еди́но естество́ тро́ицы безме́рную си́лу богосло́вил еси́, и су́етных служе́ния дерзнове́нно всему́дре изообличи́л еси́, и боже́ственными наказа́нии укре́пль. а́нгелом сожи́телниче Три́фоне, па́мять твою́ пра́зднующих соблюди́. да спасе́ни пое́м, благослове́н Бо́г оте́ц на́ших.

Ме́чь о́стр язы́к тво́й показа́ся, во христо́в стра́х вооружи́вся блаже́нне, разу́мно изообличи́ ло́пи нача́льствующих. во свиде́тельство Христа́ все́х Царя́ приводя́, и боже́ственных его́ ученико́в, поя́, оте́ц на́ших благослове́н еси́.

Богоро́дичен: Лю́тыми страсте́й наве́ты обурева́ем е́смь, и прило́ги грехо́вными погружа́ем. к твоему́ еди́ному и невла́емому приста́нищу притека́ю, уще́дрив спаси́ мя́ присноде́во, благослове́ная я́же Бо́га пло́тию ро́ждьшая.

Пе́снь 8.

Ирмо́с: Во вавило́не о́троцы боже́ственною опаля́еми ре́вностию, мучи́тели и пла́мень, преще́ние му́жески попра́вше. и посреде́ огня́ вве́ржени прохлажда́еми вопия́ху, благослови́те вся́ дела́ Госпо́дня Го́спода.

Я́рость бесо́м раздражи́ и́же уго́дники и́х, Бо́гу уго́дники твои́ми моли́твами соде́лал еси́. осия́л еси́ богому́дре земны́я конца́, ко све́ту от све́та у́мер прише́л еси́. те́м вопие́м, благослови́те вся́ дела́ Госпо́дня Го́спода.

Исцеле́ния безчи́сленна источа́ют мо́щи твоя́ преблаже́нне Три́фоне. и отгоня́ют от челове́к боле́зни душе́вныя, и теле́сныя стра́сти уврачу́ют, похваля́ющих труды́ твоя́ всече́стне, от вопию́щих ве́рно, благослови́те вся́ дела́ Госпо́дня Го́спода.

Доброде́телей труды́ и по́ты Три́фоне поко́й со все́ми святы́ми прие́мля, и́хже возвесели́ свои́м житие́м, поя́ христо́ви. благослови́те вся́ дела́ госпо́дни го́спода.

Ни гро́б забве́ния хода́тай, возмо́же твоя́ доброде́тели утаи́ти о́тче. трубы́ бо ясне́йше пропове́дает твоя́ боле́зни по́стническия, и́миже и бо́гови прибли́жися, вопия́ благослови́те вся́ дела́ Го́споди го́спода.

Богоро́дичен: И́же вы́шняго о свяще́ннобоже́ственное селе́ние. ра́дуися тебе́ бо ра́ди да́стся ра́дость Богоро́дице вопию́щым ти́, благослове́на Ты́ в жена́х всенепоро́чная Влады́чице.

Пе́снь 9.

Ирмо́с: Моисе́й на горе́, неопали́мую купину́ ви́де. Ио́сиф во верте́пе неизрече́нно рождество́ слы́ша. нескве́рная Де́во, безму́жная ма́ти. пе́сньми рождество́ твое́ велича́ем.

Благочести́вому царю́ Фео́дору я́влься, спаса́еши сего́ от сме́рти руки́ прикоснове́нием. о́ному же тя́ спаси́теля се́й напа́сти получи́ша, и́мя твое́ уве́дети хотя́, ты́ же и сие́ возвести́л еси́.

Лука́вые лю́дие тебе́ спо́ну бесо́вским сове́том учини́ти хоте́ша, е́же тебе́ сме́рти преда́ти. ты́ же си́х я́коже Моисе́й ма́нною пита́ти не престае́ши, до́ндеже си́х и в благоразу́мие приведе́.

А́ще и пита́еми, ропта́ти не престаю́т, но ты́ си́х зве́рство на кро́тость в благоразу́мие приведе́. моли́твами непреста́нными, и пе́нием, и бде́нием, до́ндеже и́х Христо́ви чи́сты предста́ви.

Глаго́лом си́ла боже́ственная после́дующая, познава́ешися от царя́ чу́вственне. о́н же по преждерече́нным хоте́ние твое́ е́же к боже́ственным во́ля исполня́я, воздарова́в тя́ отпусти́.

Богоро́дичен: Изравни́тися жела́ние ми́ вложи́ змии́ вселука́вый соде́телю. я́ко пле́нника мя́ восхи́ти. тобо́ю бо при́зван бы́х пречи́стая обожи́вся и́стинне. Ты́ бо о Богома́ти, и́же мене́ обожи́вшаго.

Тропа́рь. Гла́с 8.

Пусты́нный жи́тель, и во пло́ти а́нгел, чудотво́рец показа́ся о́тче на́ш Три́фоне. поще́ния ра́ди и бде́ния и моли́тв, исцеля́еши неду́жных, и душа́ приходя́щих ти́ с ве́рою. сла́ва да́вшему ти́ кре́пость. сла́ва венча́вшему тя́. сла́ва де́ющему тобо́ю все́м исцеле́ния.

Сла́ва. И ны́не. Богоро́дичен: Стена́ непобеди́мая на́м христиа́ном еси́ богоро́дице Де́во.