Яндекс марла шайыштеш
Йошкар-Олашты мары йӹлмӹн цифровизаци проектӹм анжыктенӹт. Мары Эл Республикӹлӓн 105 и теммӹ лӹмеш Яндекс анжыктен, кыце марла попымым тӧрӧк керӓл йӹлмӹшкӹ сӓрӓ дӓ тӹ йӹлмӹ доно вӓшештен пуа. Техень кӱкшӹцӹшкӹ шоаш манын, регион дон «Яндекс» компани лошты келшен пӓшӓлӹмӓш ылын, кыды имешшӹ годшен видӓлтӹн.
Мары Элӹн Глава ти проектӹн мары халыкын культурыжым перегӹмӓштӹ дӓ виӓнгдӹмӓштӹ кого керӓлжӹм пӓлемден.
«Ӹнде мӓмнӓн сервисвлӓ улы, кыдывлӓ марла попымым ынгылат дӓ ответӹм пуэн кердӹт. Тидӹ образованилӓн, вӓшӓ-вӓш хытыраш дӓ йӹлмӹвлӓм перегӓш пиш кого палшыкым ӹштӓ. Техень проектвлӓ – тидӹ цифровизаци жепӹн мары йӹлмӹм виӓнгдӹмӓштӹ пиш кого пӓшӓ. Россий халыквлӓн йӹлмӹвлӓм перегӹмӓштӹ яжо подарка республикӹн 105 и теммӹжӹ лӹмеш лин», – Юрий Зайцев манын.
Ӹнде Переводчик, Браузер дӓ Клавиатурым кычылтшывлӓ тӧрӧк мары йӹлмӹвлӓ доно шайышт ӓль ядын кердӹт, кынам текстӹм пецӓтлен шӹндӓш йӧн уке лиэш.
Мары йӹлмӹвлӓ гӹц предложенивлӓм сӓрӓш манын, нӹнӹм келесӓш веле келеш – молнамжы шамакым, шая сӓрӓлтӹшӹм ӓль предложеним сирен шӹндӓш (пецӓтлӓш) келеш ылын. Кӹзӹт марӹ йӹлмӹвлӓм пӓлӹдеок марын эдем доно шайышташ лиэш, тидӹлӓн Переводчик приложеништӹ «диалог» режим, йӧн улы. Шамак толшеш, иктӹ рушла хытыра, весӹ марла ответӹм келесӓ – шайыштмы лошток приложени шаям керӓл йӹлмӹшкӹ сӓрӓ дӓ келесен пуа. Мары йӹлмӹ доно попышы эдемӓт Клавиатурышты марла хытырен кердеш, кынам сирен, пецӓтлен шӹнзӓш ак ли. Сервис попымым тӧрӧк текстӹшкӓт сӓртен пуа.
Ти йӧнвлӓ гишӓн ынгылдарымыжы лошты «Яндекс» компанин регион доно кӹлӹм кычышы директор Антон Москаленков мары йӹлмӹвлӓм тенге кычылташ лимӹ пӓшӓ 2016 и годшен ӹштӓлтеш манын, кынам «Яндекс Переводчик»-ӹшкӹ пыртымы. Ти сервис Российӹн 15 йӹлмӹлӓн техень яжо йӧнӹм ӹштен, кыды В.М.Васильев лӹмӓн МарНИИЯЛИ доно иквӓреш ӹлӹмӓшкӹ пырен.
Юрий Зайцев тилошты республикӹштӹ финн-угор халыквлӓн III Всероссийский форум эртӓрӓлтӹн манын, кышты тӹнг темыжы йӹлмӹвлӓн цифровизаци ылын. В.М.Васильев лӹмӓн МарНИИЯЛИ-штӹ «Информационные технологии в филологических исследованиях» тема доно шӹмлӹмӓш ӹштӓлтеш, «Рувики» цифровой энциклопеди пӹсӹн темӓлтеш, тӹштӹ 27 тӹжем утла статья мары йӹлмӹвлӓ доно улы.
Мары Эл Республика Главан Администрацин пресс-службын отдел. «Жерӓ» №45 (10973), 14 ноябрь 2025 ин.