Вычымы «Мыры» конкурс – 35-шӹ!
«Мыры – 2025» Кырык мары районын сек яратымы конкурсын жепшӹ толын шон, тенге гӹнь шукыштат агыл У и айо сусум канда!
Но пӹтӓри кырык мары халык дӓ хынавлӓ 29- шӹ ноябрьын Виловат солан Тӹнг модельный Культура томашты эртӓрӓлтшӹ сек когон вычымы айо, кырык мары эстрада мыры конкурс «Мыры – 2025», I туржым анжен ӹвӹртенӹт. Вет тене 35-шӹ, юбилейный, конкурс ылеш.
Эстрада мыры концертӹм кечӹ мычкышты кок гӓнӓ анжыктымы ылын. Сӹлнӹ мыры дон талантан мырызывлӓм айырымы вир доно эртӓрӹмӹ концертӹштӹ шукы у мырызы сценӹшкӹ лӓктӹн. Жюрин членвлӓ мастар пӱлӓ мырызым пӓлемденӹт.
А кӱвлӓ «Мыры – 2025» гала-концертӹшкӹ вӓрештӹнӹт, 20 декабрьын пӓлӹ лиэш, кынам Я.Эшпай лӹмӓн Халык культура центрӹн тӹнг сценӹшкӹжӹ пачелӓ-пачелӓ сӹлнӹ мыры доно лӓктӹт!
Пиш выченӓ! Тӹнӓм лачокок мыры виквлӓ ярелӓ Кырык сирӹшкӓт тел дӓ У и айо толмылан кок пачаш ӹвӹртенӓ!
35 и перви тидӹ манярымшы и вара ылын? Ӓлдӓ ӓшӹндӓрӓлӹнӓ тӹнӓмшӹм, кыце мыры конкурс тӹнгӓлӓлтӹн.
Ноябрь тӹлзӹн ик телшӹ кечӹн жюрин членвлӓ Кӓтӓ Шошмар Культура томашкы художественный самодеятельностьын смотрын церотан концертӹшкӹ кыдалыныт. Мӹндӹр дӓ яжоок агыл корны кужы ылын, шутяшат, анзыкылашы план гишӓн тумаялашат веремӓ ылын. Районын газет редактор Н.М.Еропов тӹнӓм мыры конкурсым эртӓрӓш шанымашыжым келесен. Райисполкомын культура отделын вуйлатышы Александр Иванович Хват тидӹм яжоэш шотлен дӓ телевизионный «Песня года» фестиваль семӹнь У и айо анзыц «Мыры» концертӹм эртӓрӓш хытырен келшенӹт. Ик тӹлзӹ утларак веле жеп йӓмдӹлӓлтӓш ылын гӹнят, 1991 иэш Кырык сирӹштӹ шукы мырызы, ансамбльвлӓ ылыныт. Тенге пӹтӓришӹ гӓнӓ конкурс эртен.
Вес иэш культура отделын, ДК-влӓн пӓшӓзӹвлӓ анзыцок йӓмдӹлӓлтӓш тӹнгӓлӹнӹт, положеним йӓмдӹленӹт, тӹнг критеривлӓжӹ: репертуар, мырымы мастарлык, чимӹ выргем, номерӹм анжыктен мыштымаш – ылыныт. Тӹ ин гала-концертӹм нӹл гӓнӓ анжыктенӹт, кок тӹжем нӓрӹ билетӹм выжалымы ылын. Анжышывлӓ лошты залышты республика культурын министр Виктор Николаев дон Мары Элӹн Президент Владислав Зотин шӹнзенӹт. Тенге нӹнӹлӓн концерт келшен, награда вӓреш январь тӹлзӹн концерт доно Йошкар-Олашкы Сӹнгӹмӓшлӓн XXX и ДК-шкы толаш шанымашым келесенӹт.
Вес инӓт Владислав Максимович «Мыры-1993»-лан кӱкшӹ оценкым пуэн. А вет ӹлен-толын тӹдӹ ӹшкежӓт сценӹшкӹ Зинаида Игнатьева сага лӓктӹн!
Хотя тӹнӓм сценӹм олмыктарымаш дӓ сотемдӓрӹмӓш моло яжожок ылде, но кырык мары халык талантан ылеш, кыце мырызывлӓ, шактышывлӓ, композиторвлӓ, музыкантвлӓ, кӓрш мастарвлӓ, тенгеок конкурсвлӓм эртӓрӹшӹвлӓжӓт! Седӹндон «Мыры» конкурс тинӓрӹ и пиш вычымы концерт ылеш!
Мыры, мыры, ат ли гӹньӹ
Ма дон житя олмыдеш?! …
С.ИЛЬИНА. «Жерӓ» №48 (10976), 5 декабрь 2025 ин.