Юрий Зайцев национальностьвлӓ шотышты пӓшӓ Советӹн церотдымы заседаним эртӓрен

Заседаништӹ октябрь тӹлзӹн пӹтӓртӹш кечӹн Йошкар-Олашты лишӹ ик случай гишӓн ланзыленӹт. Тӹнӓм сӱӓн годым автомобиль гӹц охыр патронан пистолет гӹц воздухышкы лӱлӹнӹт, корнышты кыдалыштмы правилывлӓм тӹшлӹделыт. Цилӓжӹ ПДД-н 24 факт ылын.

Социальный сетьӹштӹ кыды-тидӹжӹ ти случайым нацивлӓ лоштышы кӹрмӓшӹмӓшеш шотлаш цацен, но регионын Главан пӓлемдӹмӹ семӹнь, тидӹ законвлӓм шотышкы нӓлдӹмӓш, кыды-тидӹн ответственность уке ылмым анжыкта.

«Мӓмнӓн республика – 50 утла национальностьлан ик кого тома, кыдывлӓ курымвлӓ доно келшен ӹлӓт. Мӓ 2026 им Россий халыквлӓн цымырын ӹлӹмӹ иэш увертӓрӹмӓш доно келшенӓ. Тагачы спецоперациштӹ шукын ик цымыр Шачмы мӱлӓндӹ верц кредӓлӹт. Тылышты яжо агыл техень поступок – тидӹ предательство доно иктӹ», – Юрий Зайцев манын.

Заседанишкӹ ӱжмӹ эдемвлӓ событилӓн ӹшке ӓкӹштӹм пуэнӹт. Мары Элӹн прокурор Илдус Нафиков тидӹ республикӹлӓн ярал агыл пример манын.

МарГУ-н ректор Михаил Швецов законым пыдыртымаш гишӓн ӓшӹндӓрӓш келеш манын.

«Региональная национально-культурная автономия азербайджанцев Республики Марий Эл» общественный организацин председатель Октай Аскерхан-оглы Гусейнов простяш ядын, анзыкыжым техеньӹ лишӓшлык агыл манын.

Регионын Глава пӹтӓртӹшеш келесен: «Закон цилӓлӓн иктӹ. Мӹнь Мары Элӹштӹшӹ ӹлӹмӓш верц ответӹм кычаш дӓ пораткам кычаш шагалтымы ылам».

Регионын Глава нацивлӓ дӓ конфессивлӓ лоштышы кӹл кычымашым, профилактика пӓшӓм тӹшлен шалгаш пытрак келеш манын.

Мары Эл Республика Главан Администрацин пресс-службын отдел. «Жерӓ» №46 (10974), 21 ноябрь 2025 ин.