Юрий Зайцев «Артек» лагерьӹштӹ Мары Эл гӹц кешӹ тетявлӓ доно вӓшлиӓлтӹн

«Артек» тетя центрӹштӹ Мары Элӹн кечӹ кымдан пӓлемдӓлтеш.

Ти кечӹм эртӓрӹмӓш икӓнӓштӹ икманяр событи лӹмеш ылеш: июньын «Артек» лагерьлӓн 100 и темӹн, Мары Эллӓн 105 и, Кого Сӹнгӹмӓшлӓн 80 и.

Регионын Глава Юрий Зайцев «Артек» центрӹшкӹ тетявлӓм кымылангдаш ӹшке кен.

«Тӓ иктӹн гӹцӓт яжон пӓледӓ: тиштӹ кӓнымӹ доно когоэшнӹмӹлӓ. Кынам мӹнь тетя ылынам, мӹлӓнем тиштӹ кӓнӓш вӓрештде. «Артек» – тидӹ сӓндӓлӹкнӓн историжӹ. Лагерь сӓмӹрӹк совет республикеш нелӹ гражданский вырсы паштек шачын. Но государство тетявлӓ верц шытырланымы вир доно ти цӱдӓ вӓрӹм пачын. Крым ӹшкежӓт айыртемӹн исторический значениӓн Российӹн регионвлӓ лошты ылеш. Крым верц соок кредӓлӹнӹт, но тӹдӹм мӓ нигынамат пуделна, соок мӓмнӓн ылеш», – Юрий Зайцев келесен.

«Артек» Международный тетя центрӹштӹ и йӹде Мары Эл гӹц 140 нӓрӹ тыменьшӹ кӓнӓ: активиствлӓ, отличниквлӓ, спортсменвлӓ, всероссийский конкурсвлӓштӹ сӹнгӹшӹвлӓ. Регионын Глава изинек шачмы вӓрӹм дӓ Отчизным яраташ, тӓнгвлӓ дон семням ӓклӓш, геройвлӓм шотеш пиштӓш келеш, кыдывлӓ хоть-махань жепӹн государствым перегӓш шагалыт манын, кымылангдымыжы годым келесен.

Юрий Зайцевӹм тетя лагерь доно пӓлӹмӹм ӹштенӹт. Маршрут мычкы ылыныт: «Прометей и дети мира» монумент, Саманта Смитлӓн памятник, пӹтӓришӹ линейкын лӹмлӹ вӓр, капитанский мостик дӓ молат.

Айыртемӹнок «Народный колорит» площадкышты мастер-класс интересный ылын, кышты тыменьшӹвлӓ традиционный мары костюмвлӓм анженӹт, чиэн кердӹнӹт дӓ тӹдӹн доно фотографируялтыныт.

Мары Элӹн кечӹм «Гусли Победы» концерт программа доно пӹтӓрӹмӹ, кыды Кого Отечественный вырсы годым мары филармонин артиствлӓн героизмӹштӹ лӹмеш ылын.

Мары Эл Республика Главан Администрацин пресс-службын отдел. «Жерӓ» №44 (10972), 7 ноябрь 2025 ин.