Тымдышывлӓ дӓ воспитательвлӓ – конкурсышты
Школ ӹлӹмӓш цилӓ семӹнь интересный: активный тымдышыланат, пӹсӹ тыменьшӹвлӓлӓнӓт ӹшкӹмӹн пӓлӹмӓшӹм, мастарлыкым йӓл вӹкӹ лыкташ тамахань йӧнӓт улы.
Теве 12 дӓ 13 мартын «Воспитатель года» дӓ «Учитель года-2026» республиканский конкурсын районышты эртӓрӹмӹ этапшы ылын. 13 мартын Эмӓнсола кӹдӓлӓш школышты тымдышывлӓ лошты эртӓрӓлтӹн, 12 мартын – воспитательвлӓ лошты Кулаковы кӹдӓлӓш школын «Солнышко» тетя садышты.
Техень тӓнгӓшӹмӓш годым сӹнгӹшӹшкӹ лӓкшӹвлӓ вара район верц республика кӱкшӹцӹштӹ ӹшке мыштымашыштым анжыктышашлык ылыт.
Тенешӹ тыменьмӹ ин педагогический мастарлыкыштым вӹц тымдышы анжыктен пуэн:
- Кузнецова Светлана Герасимовна, Эмӓнсола кӹдӓлӓш школын физикӹм, математикӹм дӓ информатикӹм тымдышы;
- Апакова Зинаида Леонидовна, Микрӓк кӹдӓлӓш школын руш йӹлмӹ дон литературым тымдышы;
- Смирнова Диана Юрьевна, Пайскырык кӹдӓлӓш школын математикӹм тымдышы;
- Яковлева Мария Геннадьевна, Усола кӹдӓлӓш школын биологи дон химим тымдышы;
- Смелова Алиса Львовна, Малосундырский-Шӹндӹрйӓл тӹнг школын математикӹм тымдышы.
Конкурсышты участвуйышы тымдышывлӓм Кырык мары муниципальный район администрацин образовани отдел вуйлатышы Е.А.Виноградова кымылангден, профессионализмӹштӹ гишӓн таум келесен.
Вӹц тымдышы Эмӓнсола кӹдӓлӓш школын тыменьшӹвлӓ палшымы доно виш уроквлӓм эртӓренӹт, мастер-классвлӓм анжыктенӹт.
Конкурсышты 1-шӹ вӓрӹм дӓ «Учитель года – 2026» лӹмӹм З.Л.Апакова сӹнген нӓлӹн!
2-шы вӓрӹм жюри А.Л.Смелова дон Д.Ю.Смирновалан пуэн.
3-шы вӓр С.Г.Кузнецова дон М.Г.Яковлевалан вӓрештӹн.
Воспитательвлӓ техень кӹдӓлӓш школвлӓн дошкольный группывлӓн участвуенӹт:
- Олекова Валентина Петровна, Кого Пистерлӓ школын воспитатель;
- Сидоркина Светлана Калистратовна, Микрӓк кӹдӓлӓш школын воспитатель;
- Матвеева Мария Васильевна, Пайскырык кӹдӓлӓш школын «Изи мӱкш» тетя садын воспитатель.
Конкурс годым тетявлӓ доно ик мероприятим дӓ мастер-классым анжыктымыла ылын. Цилӓ воспитатель конкурсеш яжон йӓмдӹлӓлтӹн, кӹзӹтшӹ жеплӓн ярал образовательный технологивлӓм кычылт мыштымыштым дӓ тетявлӓ доно келшен кердмӹштӹм анжыктенӹт.
Конкурсышты сӹнгӹшеш М.В.Матвеева лӓктӹн,
2-шы вӓр С.К.Сидоркинан, 3-шы вӓр – В.П.Олекован.
Ти этапышты сӹнгӹшӹ Зинаида Леонидовна дон Мария Васильевналан апрель тӹлзӹн эче ик гӓнӓ республикӹн цилӓ районвлӓн сӹнгӹшӹвлӓ лошты тӓнгӓшӓш вӓрештеш. Мастар дӓ кого опытан тымдышы дон воспитательлӓн эчеӓт сӹнгӹмӓшӹм согоньленӓ!
А кукшыгечӹн, 14 мартын, Эмӓнсола ДК-шты тетявлӓн мырен мыштымыштым, наставниквлӓштӹн нӹнӹм кыце йӓмдӹлен шоктымыштым «Изи мыры - 2026» конкурсышты тергӹмӹ.
12 мартын Кырык мары район гӹц кым тымдышы: Виловат кӹдӓлӓш школ гӹц Малова Т.А., Кулаковы кӹдӓлӓш школ гӹц Королева Л.И. дӓ Йоласал кӹдӓлӓш школ гӹц Саракеева М.Г. – пашкуды Суасламары Республикӹн И.Г.Мешков лӹмеш Ярабайкасинский кӹдӓлӓш школышты виш уроквлӓн Межрегиональный фестивальышты участвуен.
Мероприятиштӹ иностранный йӹлмӹвлӓм тымдышы 29 педагог тенгеок Моргаушский, Аликовский муниципальный округвлӓ гӹцӓт ылыныт. Фестивальын участниквлӓ виш уроквлӓм, урок гӹц ӧрдӹжтӹшӹ мероприятим, мастер-классвлӓм пиш яжон анжыктенӹт, а тыменьшӹвлӓ англичан йӹлмӹ доно – кӱкшӹ пӓлӹмӓшӹм.
Тымдышывлӓ яжо шанымашкы икышын шоныт – техень вӓшлимӓшвлӓ опытым шӓрӹмӓштӹ пиш керӓл ылыт. Ти фестивальым, пӓлӹмӓн, 2026 им Россий халыквлӓн икышын ӹлӹмӹ иэш увертӓрӹмӹ вир доно эртӓрӹмӹ. Пашкуды суасламарывлӓ доно келшен ӹлӹмӓш тема у агыл, лач шӹрерӓкӹн веле техень мероприятивлӓжӹм эртӓрӓш жепӹм момыла.
Техень шанымашымок Моргауш округын делегаци пӓлемден, кынам территориальный отделвлӓн вуйлатышывлӓ районышкына толын кенӹт. Анзыкыжымат пӓшӓ доно веле агыл вӓшлиӓлтӓш хытырен келшенӹт.
С.ИЛЬИНА. «Жерӓ» №12 (10991), 20 март 2026 ин.