СВО верц фестиваль-конкурс

10 октябрьын 2025 ин 6 цӓш вадеш Яков Эшпай лӹмеш Халык культура центрӹштӹ «Туан солана мыра» («Поет село родное – 2025») фестиваль-конкурсын гала-концертшӹ эртӓрӓлтӹн.

Концертӹшкӹ билетвлӓм кидӹштӹ ылшы окса доно веле касса гач нӓлӓш лиэш ылын. Мероприятим ти шотышты молы концерт гӹц айыртемӓлтшӹм ӹштенӹт, тӹдӹ пуры шанымашан (благотврительный) ылын, вет цилӓ погымы оксажы СВОшты ылшы мӓмнӓн салтаквлӓлӓннӓ колтымы лишӓшлык манын увертӓрӹмӹ!

Концерт анзыц халык анзыкы мероприятим цымырышывлӓм, артиствлӓ дон анжышывлӓм кымылангдымы дӓ тау шамаквлӓ доно Кырык мары районын «Единая Россия» партин местный оделени секретарьын заместитель Наталия Мастерова лӓктӹн.

Кого концерт ик шӱлӹш доно эртӓрӹмӹ ганьы ылын дӓ анжышывлӓлӓн пиш келшен. Программыжы 2025 ин Отечествым перегӹшӹ илӓн цӹлт келшен толын, седӹндон Туан мӱлӓндӹм перегӹмӓш тема концерт гач якшар шӹртӹ семӹнь пӓлдӹрнен. Номервлӓ йӓнгӹм тӓрвӓтенӹт, шӱмӹшкӹ вазыныт, вет нӹнӹ пишок тумаен ӹштӹмӹвлӓ ылыныт. А изи артиствлӓн мырен-куштен, ӹшкӹмӹштӹм сценӹштӹ анжыктен мыштымышты каждыйын йӓнгӹштӹ ик кого шанымашым ӹлӹжтен: специальный военный операци йӹлерӓк дӓ мӓмнӓн Сӹнгӹмӓш доно цӓрнӹжӹ дӓ мары дон эргӹвлӓ, пашкудывлӓ шу дӓ ӹлӹшӹвлӓ токышты пӧртӹлӹштӹ! Ти кымылымок Кырык мары, Йӱрнӹ районвлӓн дӓ Козьмодемьянск халан военком Владимир Васильевӹн шаяжы дӓ СВО-н участник Андрей Гаранинӹн лыдышым йонгалтарымыжы лыктыныт

Кырык мары районышты, Козьмодемьянск халашты ӹлӹшӹвлӓ дӓ хынавлӓ улы кымылын концертӹшкӹ толыныт!

С.ИЛЬИНА. «Жерӓ» №41 (10969), 17 октябрь 2025 ин.