Стартышты – 150
20-шы сентябрьын Россий мычкы тӹшкӓн кыргыжмы «Нацин кросс» таманяр миллион эдемӹм стартыш лыктын. Виловат стадион-площадкышкы техень йиш кыргыжмаш районнан спортым яратышывлӓм 150 эдемӹм цымырен. Пуры согоньвлӓ доно нӹнӹм спортсектор вуйлатышы Вениамин Семенов, муниципальный районын глава Евгений Смелов, «Единая Россия» партин местный отделенин секретарь, социальный ядмашвлӓ доно район администрацин главан заместительжӹ Наталья Мастерова, спортын ветеран Ипполит Лобанов кымылангденӹт. Россий Федерацин флагым районнан пӹсӹ кыргыжшы Арина Семенова лӱктӓлӹн. Гимнын сем йонгалтын, кыргыжаш йӓмдӹлӓлтшӹвлӓн кымылым пыртен. Шӹжгӓ юр паштек кечӓт анжалын дӓ спортсменвлӓлӓн мелӹн ли. Динамик гӹцӓт веселӓ сем шакташ тӹнгӓльӹ.
Тӓнгӓшӹмӓш иӓш семӹнь 11 тӹшкӓштӹ кеш, дистанцижӹ – ик уштыш гӹц кымыт якте. Кыргыжмы корны, стадион-площадка гӹц тӹнгӓлӹн, кугилӓ рошаш пырен, кышты изирӓк кырыквлӓӓт вӓшлиӓлтӹт дӓ мӹнгеш старт вӓрӹш толеш. Тидӹжӹ анжаш толшывлӓлӓнӓт яжо йӧнӹм ӹштен. Кӱ вара пӹсеш лӓктӹн? Шукы участник пайскырыквлӓ, кулаковывлӓ, йоласалвлӓ ылыныт, мол вӓр гӹц чӹдӹм канденӹт. Тыменьшӹвлӓн лошток 30 призер лин. Пӹтӓришӹ вӓрӹм нӓлшӹвлӓжок Кирилл Сиситкин, Татьяна Когаринова, Никита Веюков, Арина Петрова, Артем Белов, Павлина Семенова, Роман Архипов, Анастасия Чернова, Светлана Кутюшкина, Евгений Шалаев, Арина Семенова линӹт
18-29 иӓшӓнвлӓ лошты кым тӹжем метрӹштӹ призерыш пыренӹт: Кирилл Самойлов, 13.27, Владимир Зубков, 14.32, а ӹдӹрӓмӓшвлӓ лошты кок тӹжем метрӹштӹ Яна Иванова, 9.53, Анастасия Зубкова, 11.29, Кристина Мурыгина, 12.37. 30-39 иӓшӓнвлӓ лошты кым уштышышты Григорий Ярускин, 12.45, Кирилл Моляров, 14.17, айыртемӓлтӹнӹт, а ӹдӹрӓмӓшвлӓ лошты коктышты – Алла Долганова, 10.39. 40-49 иӓшӓнвлӓ лошты кым тӹжем метрӹштӹ призервлӓ линӹт: Леонид Захаров (Москва хала гӹц толшы, цилӓ участник лошты кокшы веремӓм анжыктен, 12.15), Александр Зубков, 13.01, Василий Кузьмин, 13.21, а ӹдӹрӓмӓшвлӓ лошты ик уштышышты Вера Кокушкина, 4.47, Светлана Емельянова, 5.01, Мария Саракеева, 5.14. 50-59 иӓшӓнвлӓ лошты кок тӹжем метрӹштӹ пӹсӹн Александр Пайгачкин, 8.14, Александр Смелов, 10.01 кыргыжыныт, а ӹдӹрӓмӓшвлӓ лошты 1000 метрӹштӹ Людмила Якимова, 5.46. 60- 70 иӓшӓнвлӓ лошты 2000 метрӹштӹ Юрий Абрамов, Сергей Иванов, Ипполит Лобанов призер линӹт.
Цилӓ призерлан цевер медальвлӓ, дипломвлӓ вӓрештӹнӹт. Шукы участникӹм Йоласал кымдем гӹц Василий Кузьмин канден, командылан шӧртньӹ цӹреӓн кубокым пумы. Тӹнг школвлӓн командывлӓ лошты пистерлӓвлӓ айыртемӓлтӹнӹт, а кӹдӓлӓш школвлӓ лошты – виловатвлӓ. Кок командыланат кубоквлӓ вӓрештӹнӹт. Вот ма ӧрӹктӓрӹш – командывлӓштӹ сага сола кымдем администрацин ик главамат ужаш ӹш ли. А ӹжӓл. Вуйлатышывлӓ спортсменвлӓм, физкультурниквлӓм кымылангдаш ак пижеп гӹнь, шылдыран девиз «Спорт – ӹлӹмӓшӹн норма» лин ак керд.
А кыргыжшывлӓм октябрь тӹлзӹн Пӓшӓн Геройвлӓ Ольга Аталаевам, Елизавета Мироновам ӓшӹндӓрӹмӹ лӹмеш стартвлӓ вычат.
З.АФОНЬКИН. «Жерӓ» №38 (10966), 26 сентябрь 2025 ин.