Сирӹшӹ улы – книгӓм лыктыт
У и тӹнгӓлтӹшӹн ЙошкарОлашты «Мары книгӓ издательство» издательский пӧртӹштӹ пиш яжо вӹлвӓлӓн дӓ интересный кӧргӓн книгӓ «светӹм ужын». 6+ информационный продукци пӓлӹкӓн ылеш, тенгежӹ гӹнь тӹштӹ ямаквлӓ, шайыштмашвлӓ улы, кыды тетявлӓлӓн ярал ылыт
Цевер книгӓн лӹмжӓт «Цӱдӓ сӓндӓлӹк», кышты шайыштмашвлӓн геройвлӓ доно 21 истори лиӓлтеш. Вет тӹштӹшӹ изи ӹдӹрӓш дон эргӓшвлӓ гӹц пасна каляат попен мышта, пурылан пуры доно вӓшештӓ, тетявлӓм яжон тыменяш, тӧр сирӓш, уроквлӓшкӹ со кашташ тымда. Лыдшывлӓм ӧрӹктӓрӹшӹ историвлӓ, цӱдӓ приключенивлӓ вычат.
«Цӱдӓ сӓндӓлӹк» книгӓ – Россий писатель ушемӹн член Тамара Петрова-Денисован тетявлӓлӓн сирӹмӹ кокшы книгӓжӹ. Книгӓм Мары Эл Республикӹн «2013-2030 ивлӓштӹ Мары Эл Республикӹн кугижӓншӹ национальный политикӹжӹ» кугижӓншӹ программыжы семӹнь лыкмы. А тишкевек якте авторын «Омын ӓль ямак», «Препятствие» дӓ «Йылжы йога» книгӓвлӓжӹ светӹм ужыныт ылын.
Нӹлӹмшӹ книгӓ пецӓтлӓлтмӹ вир доно 18 мартын Н.Игнатьев лӹмӓн Районный библиотекӹштӹ тӹдӹн презентацижӹм эртӓрӹмӹ. «Шӧртньӹ тылип» литературно-творческий клубын погынымашкы авторым кымылангдаш Микрӓк кӹдӓлӓш школышты тымдышыжы В.Ф.Сильвестрова, поэт С.А.Вассанова, журналист Е.К.Савельева, композитор С.И.Метелкина, библиотекарьвлӓ, Зема дон Владимир ӓкӓ-ӹзӓжӹ, Е.Г.Алехина дӓ молат толыныт.
Автор Тамара Денисова творчествыжым шотеш пиштен толмылан таум келесен, туан семняжӹ дӓ ӹлӹмӓш корныжы доно пӓлӹмӹм ӹштен. Клубышкы писательӹм шотеш пиштен толшывлӓ произведенивлӓжӹ дӓ писатель гишӓн ӹшке шанымашвлӓштӹм келесенӹт, авторын лыдмы икманяр лыдыш дӓ шайыштмашвлӓжӹм колыштыныт.
Тамара Елисеевнан кыды-тидӹ лыдышеш композиторвлӓ Александр Соснов дон Софья Метелкина семвлӓм келӹштӓренӹт, нӹнӹмат автор дон краеведческий отдел вуйлатышы Л.А.Леонтьева мырен пуэвӹ. Мырывлӓ йонгалтмыкы, цилӓн тӹдӹм шамаквлӓ дон семвлӓжӹге мактевӹ.
Кыды-тидӹ ямак доно «Йӓмдӹ ли» газетӹм лыдшывлӓ вӓшлиӓлтӹнӹт, вет автор тетя газет доно цаткыды кӹлӹм кыча.
Книгӓм сусунок кычаш дӓ ӹвӹртен лыдаш лижӹ манын, Н.Н.Головина пиш яжон шукы цӹреӓн рисункывлӓ доно сӹлнештӓрен.
Тау авторлан у книгӓжӹ гишӓн. Цилӓн кырык мары йӹлмӹ доно сирӹшӹ писатель доно когоэшненӓ. Сирӹшӹ улы – книгӓм лыктыт, цевер книгӓ шачын гӹнь, тӹдӹм лыдаш келеш.
С.ИЛЬИНА. «Жерӓ» №13 (10992), 27 март 2026 ин.