Сессиштӹ – республикӹн 2036-шы и яктешӹ виӓнгмӹжӹ гишӓн

Йошкар-Олашты сесси пачылтын, кышты Мары Элӹн 2036 и якте социально-экономический виӓнгмӹ Стратегижӹн проектшӹм раскыдемдӹмӹ.

Регионын Глава Юрий Зайцев республикӹн тӹнг стратегический документшӹм ланзылымаш 10 иэш виӓнгӓш старт ылеш манын.

«Мӓлӓннӓ тӹнг корнывлӓм пӓлемдӓш келеш, тидӹн годым национальный цель дон задачывлӓм шотышкы нӓлмӹлӓ, кыдым Российӹн Президент В.Путин майский указыштыжы келесен. Стратеги семӹнь экономикӹн цилӓ сферӹштӹжӹ у кӱкшӹцӹштӹ лишӓшлык, эдемвлӓн ӹлӹмӓшӹштӹ яжоэмшӓшлык», - регионын Глава келесен.

Стратегин планым Юрий Зайцевӹн поручени доно декабрь 2024 ин ӹштӓш тӹнгалмӹ. Документӹм тумаен ӹштӹмӓшкӹ исполнительный властьын органвлӓ дӓ местный самоуправленин, бизнесӹн, научный организацин ышан-шотан эдемвлӓм пыртымы. Республикӹштӹ ӹлӹшӹвлӓ доно хытырымы, вӓшлимӓшвлӓм эртӓрӹмӹ.

Ти документӹшкӹ куд сек тӹнг направленим пыртымы: демографи дӓ семня политика, образовани дӓ наука, сӓмӹрӹквлӓн политика, приборостроени, фармацевтика дӓ малотоннажный хими, туризм.

Стратегим тумаен ӹштӹшӹвлӓ регионын ма доно виӓн ылмыжым пӓлемденӹт: технологичный отрасльын виӓн секторвлӓжӹ: ИТ, приборостроени, машиностроени; конкурентный научно-образовательный комплекс; шӹргӹ ресурс; кӱкшӹ пӓшӓм анжыктышы сола хозяйство дӓ молат.

Стратегим 2036 иэш ӹлӹмӓшкӹ пыртен шоктымыкы, внутренний региональный продукт 1,7 гӓнӓ кушкеш, инвестици – 2 гӓнӓ, бюджетӹндоходшы – 1,6 гӓнӓ.

Юрий Зайцевӹн увертӓрӹмӹ семӹнь, 2025 ин август гӹц 15 сентябрь якте проектӹн общественный ланзылымаш эртӓ, и пӹтӹмӹ якте Стратегин планым пингӹдемдӹмӹлӓ дӓ ӹлӹмӓшкӹ пырташ тӹнгӓлмӹлӓ.

Мары Эл Республика Главан Администрацин пресс-службын отдел. «Жерӓ» №35 (10963), 5 сентябрь 2025 ин.