Республикӹн Глава Юрий Зайцев – Козьмодемьянскышты пӓшӓ доно

Регионын Глава сага «Герои Марий Эл. Талешке-влак» региональный кадровый программа семӹнь тыменьшӹвлӓ логӹц Владислав Шеин дон Павел Попов ылыныт. Юрий Зайцев «Улицы старого Козьмодемьянска» общественный территориштӹ ӹштӹмӹ пӓшӓм ӓклен.

«Йыл сирӹштӹ вӓрлӓнӹшӹ ти хала улы сӓндӓлӹк гӹц туриствлӓм токыжы шыпшеш. Причалым ӹштӹмӹ паштек эче шукыракын толыт, тене 511 теплоход шагалын. Халашты ӹлӹшӹвлӓӓт кӓнен кердӹт», – регионын Глава пӓлемден.

Проект – 2024 ин IX Всероссийский конкурсышты сӹнгӹшӹ, шӹжӹм ӹштен пӹтӓрӹмӹ. Тидӹлӓн 65 млн тӓнгӓ керӓл лин.

Регионын Глава А.В.Григорьев лӹмӓн Художественно-исторический музейӹм анжал лӓктӹн, кышты керӓл техника шотышты палшыкым 8,9 миллион тӓнгӓӓшӹм ӹштӹмӹ.

Тенгеок Юрий Зайцев национальный проектвлӓм кычылтмаш семӹнь халашты библиотекӹм дӓ спортплощадкым ходышкы колтымым терген анжал лӓктӹн. Тӹнӓм ти кок социальный объектӹм торжественно пачмы ылын. Библиотекӹм уэмден яжоэмдӹмӓшлӓн: у техникӹлӓн, книгӓ фондлан, компьютерный техникӹлӓн, мультимедийный оборудованилӓн, интерьерӹм вашталтымылан – 15 млн тӓнгӓ керӓл лин.

А 1-шӹ № кӹдӓлӓш школын кудывичӹштӹ «ышан» спортплощадкым «Бизнес-спринт (Я выбираю спорт)» федеральный проект семӹнь ӹштӹмӹ.

«Спорт объектӹм пачмаш сӓмӹрӹк атлетвлӓм кушташ палшымылан ӹнянем», – регионын Глава манын.

Площадкым пачмы кечӹн пӹтӓришӹ соревновани ылын.

Юрий Зайцев вӓшлимӓш годым Козьмодемьянскышты туризмӹм виӓнгдӹмӓшӹм Владислав Шеин дӓ Павел Попов доно ланзылен, сагашты СВО-н участник Сергей Лаврентьев ушнен.

«Туризмӹм виӓнгдӓш Козьмодемьянскышты шукым ӹштӹмӹ, но тиштӹ, шачмы вӓрӹштӹ, ӹлӹшӹвлӓн цацымыштат керӓл ылеш. Инвесторвлӓмӓт моаш келеш, тидӹ отельервлӓ, рестораторвлӓ ылыт. Тишкӹ тӓӓт ушнен кердӹдӓ», – Юрий Зайцев пӓлемден.

Программын участниквлӓ тусарен колыштыныт. Сергей Лаврентьев республикӹн Правительствылан палшымы гишӓн таум келесен.

Мары Эл Республика Главан Администрацин пресс-службын отдел. «Жерӓ» №46 (10974), 21 ноябрь 2025 ин.