Регионын Глава – у сборникӹн презентациштӹ

Юрий Зайцев: «Халан ӹлӹшӹвлӓн пӓшӓ подвигӹштӹ ик йых дон весӹм уша, патыр шӱлӹшӓн лиӓш дӓ шачмы вӓрӹм яраташ тымдаш тӹнгӓлеш».

«Трудовой подвиг города Йошкар-Олы в годы Великой Отечественной войны (1941-1945 гг.)» документ дӓ материалан у сборникӹм Сӹнгӹмӓшлӓн 80 и лӹмеш лыкмы. Сборникӹн тиражшы 500 экземпляр.

«Тидӹ эче ик ашкыл историн тӧр ылмыжым перегӹмӓштӹ, сӓмӹрӹк йыхлан халыкын героизмжӹ гишӓн шайышташ йӧн», - Юрий Зайцев манын.

Архивный документ дон материалвлӓ, периодический печать негӹцеш Йошкар-Олан Сӹнгӹмӓшӹм кандымашты пӓшӓжӹ, военный дӓ гражданский хӓдӹрвлӓм цӓрнӹдеок ӹштӹмӓштӹ пӓшӓ подвигшӹ гишӓн тӧр сирен анжыктымы.

Сборникӹн презентаци годым тенгеок Мары Элӹн Государственный Собранин Председатель Михаил Васютин кымылангдымы шамаквлӓм келесен.

Мероприятишкӹ пӓшӓ династивлӓн представительвлӓм ӱжмӹ ылын. Иктӹн негӹцӹм пиштӹшӹ – Петр Перерезов. Тӹдӹ пӓшӓм ӹштӓш Кого Отечественный вырсы лошты, кынам октябрь 1942 ин вооруженин Наркоматын ОКБ-43-м Йошкар-Олашкы эвакуируйымы ылын, тӹнгӓлӹн. Вара тӹдӹм 297 № заводышкы (кӹзӹт «ММЗ» АО) ваштенӹт, кышты 50 и пӓшӓлен. Кызӹт роды йых эдемжӹ тӹнг инженерӹн заместительжӹ – отдел начальник, пӓшӓн ветеран ылеш. «ММ3» АО-шты 28 эдем Перерезов-Михеев династи гӹц пӓшӓлен, иквӓрешӹжӹ 500 и нӓрӹ погына.

Сборникӹм лыкташ Йошкар-Олан администрациштӹ лӹмӹн редакционный советӹм цымырымы ылын, кыдым истори наукын кандидат Ольга Кошкина вуйлатен.

«Цилӓлӓн тау, кӱвлӓ сборникӹм йӓмдӹленӹт. Тӓмдӓн пӓшӓдӓ велдӹк курымвлӓэш халашты ӹлӹшӹвлӓн подвигӹштӹ перегӓлт кодеш», - республикӹн Глава мероприяти мычашты манын.

Книгӓ Йошкар-Олан, республикӹн историм пӓлӓш цацышывлӓлӓн пиш керӓл ылеш.

Мары Эл Республика Главан Администрацин пресс-службын отдел. «Жерӓ» №32 (10960), 15 август 2025 ин.