ПФО-шты Россий Президентӹн Полномочный представитель Мары Элӹн экономикӹн анзыкыла виӓнгмӹжӹм пӓлемден

Йошкар-Олашты Игорь Комаров дон Мары Элӹн Глава Юрий Зайцев 2025 ин регионын анзылтымашвлӓжӹм ланзыленӹт, анзыкылаэш задачывлӓм пӓлемденӹт.

«2025 ин валовый региональный продукт 2,3% кушкын. Экономикӹн тӹнг отрасльвлӓштӹ анзыкыла виӓнгмӓш улы. Республикӹн бюджет 4,7 процентеш шукемӹн, ӓль 2,1 миллиард тӓнгӓэш», - Юрий Зайцев манын.

Полномочный представитель Игорь Комаров регионын социально-экономический пӓшӓжӹм ӓклен.

«Мары Элӹштӹ цилӓ икӓнӓштӹ виӓнгеш: экономика, социальный сфера, инфраструктура, СВО-н участниквлӓлӓн палшымаш, образовани дӓ культура иквӓреш пӓшӓлӓт дӓ икӹжӓк-иктӹштӹлӓн кычык ылыт. Мӓмнӓн тӹнг задачына: эдемвлӓлӓн тыр дӓ икладын кешӹ ӹлӹмӓш, анзыкылашеш ӹшкӹлӓн дӓ тетявлӓлӓн ӹнян лижӹ», - Игорь Комаров пӓлемден

Мары Элӹн Главан увертӓрӹмӹ семӹнь, 12 национальный проектӹм ӹлӹмӓшкӹ пыртымаш 108 объектӹм ходышкы колташ палшен. 2025 ин куд объектӹм цӹлт угӹц ӹштӹмӹ, 9 школ дон тетя кок садым уэмден тӧрлӹмӹ, 54 территорим дӓ 200 км корным яжоэмден тӧрлӹмӹ. 2026 ин 135 объект планышты ылеш.

Цилӓ тидӹлӓн социально-экономический виӓнгмӹ индивидуальный программа (ИПР 2.0) палшен: 297 у пӓшӓ вӓрӹм пачмы, кым миллиард утла тӓнгӓ инвестицим кычылтмы.

2036-шы и яктешӹ у стратегилӓн нӹл тӹнг корны лиэш: у технологиӓн регион, сӓмӹрӹквлӓлӓн йӧнӓн регион, кӱкшӹ качестван ӹлӹмӓш, культура дӓ гостеприимствын регион.

Вӓшлимӓштӹ айыртемӹн СВО-н участниквлӓлӓн палшымы гишӓн шайыштмы. Нӹнӹлӓн 124 йиш палшык улы. «Перспектива» центр палшымы доно 503 эдем пӓшӓшкӹ шагалын.

Совещаништӹ РФ-н Госдумышкы лишӓшлык айырымаш гишӓн ядмашвлӓм раскыдемденӹт.

«Выбор тӧр дӓ безопасно эртӹшӓшлык. Тенге веле тӹдӹлӓн ӹнянӹмӓш лиэш», – Игорь Комаров манын.

Мары Элӹн Главан увертӓрӹмӹ семӹнь, анзыцрак айырымашым эртӓрен анжымашты республикӹштӹ ӹлӹшӹвлӓ активный ылмыштым анжыктат манын.

Мары Эл Республика Главан Администрацин пресс-службын отдел. «Жерӓ» №22 (11002), 5 июнь 2026 ин.