Кого буквавлӓ доно сирӹмӹ ФЕРМЕР
Фермер Андрей Бабушкин туан Кырык мары районыштыжы веле агыл, а Мары Эл Республика мычкы пӓлӹмӹ ылеш. Андрей Аверкиевичӹм кого буква доно сирӹмӹ Эдем дӓ Фермер тӹдӹм яжон пӓлӹшӹвлӓ маныт.
Пайскырык вел Пӹнгель Парнингӓш солаэш шачшы фермер верц улы Кырык мары районышты ӹлӹшӹвлӓ сусу линӹт, вет 31 июльын 2025 ин Россий Федерацин Президент Владимир Путинӹн 529-шӹ № указ доно Андрей Бабушкинлӓн, индивидуальный предприниматель – хресӓнь (фермерский) хозяйствын главалан, шотеш пиштӹмӹ «Заслуженный работник сельского хозяйства Российской Федерации» лӹмӹм пумы. Техень почетный лӹмӹм кырык марын фермерлӓн сола хозяйствышты пиш керӓл пӓшӓжӹ дӓ шуки и тӹдӹлӓн ӹнян ылмыжы гишӓн пумы.
Ӓрня перви Кырык мары районыштына 22 августын 17-шӹ межрегиональный научно-практический семинар эртӓрӓлтӹн, а вет «Бабушкин» ООО-шты техень «День овощного поля» мероприятим эче тагынамок цымырымы ылын. Тӹнӓм Парнингӓш солашты тӹ жеплӓн пиш керӓл «День поля по овощным культурам» семинарышкы сола КФХ вуйлатышывлӓм дӓ тӹнгӓлшӹ фермервлӓм ӱжмӹ ылын.
Тӹнӓм пиш яжо ире кавшта нырышты погыненӹт. Андрей Аверкиевич цилӓ тӹнӓмок наука тымдымы доно ныр пӓшӓм ӹштӓш цацен: севооборотым тӹшлен, удобреним шӓвен, гибридвлӓм лыктын, тӹнӓмок квадрокоптерӹм нӓлӹн дӓ пӹлгом гӹц кушкышвлӓм оролен: ик ӓнгӓ вес ӓнгӓ доно цӹрежӹ доно айыртемӓлтӹн, вет кавшта гӹц пасна, якшар ушман, охырец, роколман гибридвлӓ кушкыныт, а хранилищӹштӹ йӓшӹквлӓ йӹде у сортвлӓ шачыныт.
Тӹнӓм семинарышты фермервлӓн коопераци гишӓнӓт шанымашвлӓм тӓрвӓтенӹт ылын, а 17-шӹ семинарышты тидӹ гишӓн шаяжат ылде, вет ӹнде кырык марын фермервлӓн «Агропродукт» СССПОПК улы, председательжӹ, «АГРОРЕГИОН» ООО-н генеральный директоржы, агроагрегаторжы Сергей Ильин ылеш.
Кӹзӹт фермер шукы у технологим, техникӹм, оборудованим дӓ молымат хозяйствыштыжы кычылтеш, солан ныр пӓшӓшкӹ пыртен миӓ, сӓмӹрӹквлӓ веле тӹдӹн примержӹм ужышты.
Андрей Аверкиевич, тӓмдӓм шотеш пиштӹмӹ лӹм доно кымылангденӓ. Тӓ верцдӓ сусу ылына. Анзыкылаэш цаткыды шулыкым, цӓшӹм согоньленӓ, ӹлӹмӓштӹдӓ цилӓ толкеш толжы!
С.ИЛЬИНА. «Жерӓ» №34 (10962), 29 август 2025 ин.