2030 иэш Мары Элӹштӹ 100 утла почтым уэмдӹмӹ лиэш

Ти пӓшӓ Россий Президент Владимир Путинӹн келесӹмӹ семӹнь пакыла кешӓшлык. Толшаш кок и лошты 41 отделеним тӧрлӹмӹ лиэш.

Тидӹ гишӓн регионын Глава Юрий Зайцев дон Федеральный почтовый связьын (УФПС) директор Андрей Виногоров доно вӓшлиӓлтмӹ паштек пӓлӹ лин.

Республикӹн Глава Россий Почтын халык лошты пиш керӓл ылмыжым пӓлемден, айыртемӹнок – мӹндӹр солавлӓштӹ.

«Цифр технологи жепӹн почтовый кӹлӹн миссижӹ вашталтдымы кодеш – эдемвлӓ дон кымдемӹм кужы уштышвлӓм анжыде ушымаш. Тидӹ солашты пиш керӓл, кынам почта социальный дон государственный услугывлӓн ӹрдӹжӹ ылеш. СВО-шкы салтаквлӓлӓн посылкывлӓмӓт тӓр тӱлӹдеок почта доно колтымыла. Мӓмнӓн геройвлӓлӓн техень увер туан томашты гӹц пиш керӓл ылеш», – регионын Глава манын.

Андрей Виногоров палшымаш гишӓн таум келесен. 2025-2026 ин Мары Эл Республикӹн законвлӓ семӹнь УФПС имущество дон транспортный налогвлӓм тӱлӹмӓш гӹц карангдымы ылын. 6 миллион тӓнгӓӓш налог оксам пӓшӓдӓрӹм пумашкат колтымы.

Мары Элӹн УФПС-шты шукы эдем пӓшӓлӓ, штатышты 1,2 тӹжем утла эдем ылеш. Нӹнӹ 5 почтамтышты, 257 отделеништӹ, ти шотышты 193 отделени солашты вӓрлӓнӓ.

Мары Эл «Земский почтальон» конкурсышкы ядмашым пумы шот доно анзылны ылеш.

2025 ин УФПС шӹм миллион утла сирмӓш дон бандерольым халык лошты шӓлӓтен, 300 тӹжем посылкым, тӹ шотышты 600 СВО-шкы колтымы. Почтальонвлӓ 4,5 миллион экземпляр газет-журналым дӓ 7,7 миллион коммунальный тӱлӹмӓш квитанцим шӓлӓтенӹт, пенси дон пособим 55 тӹжем пенсионерлӓн канден пуэнӹт

Мары Эл Республика Главан Администрацин пресс-службын отдел. «Жерӓ» №15 (10994), 10 апрель 2026 ин.